“Pilipili ameondoka wakati Taifa linamhitaji” – Steve Nyerere

DODOMA:MWENYEKITI wa Taasisi ya Mama Ongea na Mwanao, Steve Mengele maarufu kama Steve Nyerere, amesema kifo cha mchekeshaji MC Pilipili kimetokea katika wakati ambao taifa lilikuwa bado linamhitaji kwa kiasi kikubwa.

Akitoa salamu za pole kwa familia, ndugu, jamaa na marafiki wa marehemu, Steve Nyerere alisema taifa lote linaomboleza kuondokewa na msanii aliyekuwa na mchango mkubwa katika sanaa na jamii.

Amesema kuwa MC Pilipili alikuwa msanii mahiri aliyekuwa na uwezo wa kuleta hamasa na kuongeza nguvu kazi katika taifa, hivyo kuondoka kwake kumewaumiza wengi.

Aidha, Taasisi ya Mama Ongea na Mwanao imetoa mchango wa Sh milioni tano kusaidia elimu ya watoto wa marehemu MC Pilipili kama sehemu ya kuonesha upendo na mshikamano kwa familia.

“Pilipili ameondoka muda ambao kama nchi ilimhitaji kuongeza nguvu kazi. Tumepoteza mtu muhimu sana,” amesema Steve Nyerere kwa uchungu.

Marehemu MC Pilipili amezikwa jana jioni katika makaburi ya Jijini Dodoma, Tanzania, huku maelfu ya waombolezaji wakijitokeza kumuaga.