“Namuheshimu sana Alikiba” – Diamond
DAR ES SALAAM: MSANII nyota wa Bongo Fleva, Naseeb Abdul ‘Diamond Platnumz’, amefunguka kuhusu heshima kubwa aliyonayo kwa msanii mwenzake Ali Kiba, licha ya tofauti zilizowahi kutokea kati yao katika tasnia ya muziki.
Diamond amesema kuwa amekuwa akimuheshimu Ali Kiba tangu enzi za mwanzo wa muziki wake kutokana na uwezo na uthubutu aliouonyesha katika kudumu kwenye tasnia hiyo kwa muda mrefu.
“Ngoja niwaambie ukweli, mimi sina tatizo nae tangu nilivyotoka. Nilikuwa natamani kufanya wimbo na Ali Kiba. Namheshimu sana kwa jinsi alivyoendelea kubaki kileleni mpaka leo. Watu wengi wanadhani ni jambo dogo, lakini ‘kumaintain status’ ni kitu kigumu sana,” amesema Diamond.
Amefafanua kuwa chanzo cha sintofahamu kati yao kilitokana na mkanganyiko wa kazi ya muziki waliokuwa wakipanga kufanya kwa pamoja.
“Tulikutana studio kwa KGT ambaye ni producer wake. Nilimwambia tufanye wimbo wa pamoja hata nilipomwonesha Lala Salama nilimpa nafasi aweke verse yake. Lakini pengine hakuwa tayari, akaamua kufanya ‘hard lip’” ameeleza Diamond.
Ameongeza kuwa hakuwahi kuchukulia tofauti hizo kama ugomvi binafsi bali kama jambo la kawaida katika kazi.
Wasanii hao wawili wamekuwa wakihusishwa kwa muda mrefu na ushindani wa kimuziki, lakini kauli hii ya Diamond imeibua matumaini mapya kwa mashabiki wanaotamani kuwaona wakifanya kazi ya pamoja siku moja.
